X
تبلیغات
پیکوفایل
دوشنبه 26 دی‌ماه سال 1390 @ 06:54 ب.ظ

« آیریلیق »

« آیریلیق »

 

نازلی یار عشق اودونا بیرده آلیشدیم

یئنه جانان لا کوسوب غم له باریشدیم

بیرده او دورنا گؤزون گؤرمگینه جانلا چالیشدیم

یئنه ده قان لا قاریشدیم

یئنه کؤنلوم نه اولوبدور توتولوبسان

هانسی لیلا سایاغا مجنون اولوبسان ، وورولوبسان

ندی دردین نیه بس قانلا دولوبسان؟

یار تک ، سنده اورک ، آتما منی

بیر خومارگؤز مارالین قایغی سینا ساتما منی

سنده جانان کیمی آلداتما منی

غم ایله ، ماتم ایله قاتما منی

یئتر آغلاتما منی .

نه اولار سنده بیرآز مهر و محبت گؤره سن.

دیل بیلن یارین اولا ، شوق ایله نازین چکه سن.

یار سنین یارین اولا ، او قارا زولفون هؤره سن.

بو قدر آغلاماییب بیر گوله سن.

دونن آخشام یئنه گئتدیم گؤرم او نازلی یاری

وعده وئرمیشدی گله بیرده باری

نئجه اود ووردو منه او گؤروشون اینتیظاری

گلمه یین گئتمه یه قاتدی دلی کؤنلوم نیگاری

بیرده باخدی اوزومه ایسته دی گئتسین

دؤزمه دی سؤزلریمی کامیل ائشیتسین

نه اولوردو او منیم حالیمی بیلسین .

بیر قدم گوتدو چاغیردیم :

نه اولور گئتمییه سن

منی ترک ائتمیه سن

دؤندو باخدیم اوزونه

دوشدو یالوارماغا دیل ، آغلاماغا گؤز

گئتمه بیر دؤز

سنه یالوارمیرام ، آمما

بونو یالوارماق حئسابلا

اوخ اولوب باغریما باتما

منی آتما .

دؤندو تحقیر ایله باخدی

غم اوخون قلبیمه تاخدی

کؤنلومو اودلادی یاخدی

دئدی : آخیر نه دئییم باشقا یاریم وار

سنه من سؤز وئره بیلمم ، اؤزومون سؤز وئرنیم وار

نه یامان وئردی جواب او سؤزومه

بیر زامان چیخدیم اؤزومدن ، یئنه گلدیم اؤزومه

اوندا بیلدیم کی گئدیبدیر او گوزل یاریم الیمدن

نئجه اینصاف ائلدی او آییران جانی تنیمدن

ایکی ال بیر باشیم اولدو

ائله بیل یوز یاشیم اولدو

بوغازیم توتدو قهر، باتدی سسیم

ائله بیل کی کسیلیردی نفسیم.

 اودا باخماقلا منه گؤزلری دولدو

سارالیب هئیوا کیمی ، گول کیمی سولدو.

آغلادیق هر ایکیمیز یاش توکنینجه

بو صداقتلی سئوینجه

گؤزو آغلار سسی سیزلاردیله گلدی

سانکی بی دین ، دینه گلدی

دئدی ، سن هر نه دئمیشدینسه ایناندیم

سنی مجنون کیمی ساندیم

سنی یاندیرماغا یاندیم

چوخ اوتاندیم ،

من سنین عشقینه لاییق دئییلم

بیه مندن سورا گؤز قاره سی یوخدور ،

آیریلیق دیر یولوموز

چاره سی یوخدور.

بو سؤزایله گئدرک آتدی منی

غم ایله ، نیسگیل ایله قاتدی منی

آخ نئجه آغلاتدی منی.

یاندی قلبیم اودونا ، توستوسونه عشقه بوغولدو

وئردیگیم قول شرف سیندی اوغولدو

گلدی یورغون سره لندی

گؤزلریندن یاش الندی.

توتدو اوز تانریا ، قیشقیردی ،  باغیردی :

هئچ کیمین سئوگیسینی باشقاسینا یار ائله مه

بیر طبیبه ایکی کس کونلونی بیمار ائله مه

منی بوندان دا بؤیوک درده گرفتار ائله مه.

آغلاماقدان دا یورولدو

سیلدی گؤز یاشلارینی سوسدو بوغولدو

آچدی غم دفترینی قان ایله یازدی :

منی هئچ کیمسه اینانماز

سؤزومو دردیمی قانماز

دوشر عاشیق اودا البت

هئچ کیم آنجاق ، بئله یانماز.